好耐冇睇過一套咁令人深刻嘅劇，《后翼棄兵》（The Queen’s Gambit）成功做到了。睇完真係有種回甘味，久久未散。七集唔多，強烈推介。
而今日開呢個 post，主要係想分享下成套劇最深刻嘅一幕。（有劇透，自己斟酌先睇）
＊
＊
＊
＊
＊
真係有劇透！
＊
＊
＊
＊
＊
最愛當然係 Beth 喺屋企著住吊帶睡衣醉住跳舞嘅一幕 ❤️（被打）
唔係喇，講緊嘅係劇嘅尾聲──Beth 贏到世界冠軍之後，自己一個走去同公園嘅阿伯捉棋嘅一幕。
我非常鍾意套劇嘅中文譯名《后翼棄兵》（一種封閉式開局），本身都係以棋比喻緊 Beth 係一個封閉自己嘅人，佢自幼冇咗雙親。心中一直充滿憤怒，而且渴望勝利。而西洋棋就係佢嘅勝利工具。
記得第五集 Harry 臨走之前送咗本書俾 Beth，認為佢會好似當年另一位傳奇棋手 Morphy 咁，好後生就拎到冠軍，繼而失去目標然後退休，最後英年早逝（顯然係見到 Beth 濫藥所以咁講）。
自從巴黎一戰失意之後，Beth 就一陣陷入低谷。直到劇嘅最後一集。Beth 終於意識到自己從來都唔係孤獨一個，有好多人一直關心緊自己。喺孤兒院舊友 Jolene 嘅倍伴下，佢開始明白生活唔係剩得西洋棋，慢慢擺脫酒藥成癮嘅問題，以最佳狀態前往蘇聯打世界大賽。
再喺一眾曾經嘅競爭對手，而家嘅戰友嘅協助下，佢終於喺戰勝最強嘅對手 Borgov，成為世界冠軍。（呢幕係夠晒熱血）
最後一幕，當 Beth 行出車，喺戶外環境慢慢咁扣返自己嘅白衫衫鈕。配合逐漸高昂嘅配樂，佢一臉豁然開朗、亦充滿自信、行起上嚟彷彿擺脫枷鎖一樣。
佢並冇好似當初 Harry 咁講，達到顛峰之後就失去人生意義。反而脫胎換骨，唔再係以前嗰個封閉自己心靈，心中只係得勝利嘅女孩。
最後，Beth 望住嗰一位好似 Mr.Shaibel 嘅蘇聯伯伯，佢再忍唔住內心嘅喜悅。
回想返多年前，喺雜物房第一眼就迷上西洋棋嘅小女孩。當刻點會執著於勝利？寂寞嘅皇后，其實最想要嘅只係他人陪伴嘅快樂。
作為一個創作人，睇到呢度當然好感觸。當一件興趣可以為你得到更多嘅時候，有時就可能會為咗目標而慢慢偏離自己，最後越走越遠……
願所有陷入呢種狀態嘅創作人（包括我），終有一日可以搵返自己嘅初心。
最後，再推介一次，堅係好睇。
#thequeensgambit #netflix
－－－－－－－－－－－－－－
本人 Patreon，有故事、遲下都會寫下劇評影評。
https://www.patreon.com/echoofheart
IG：echoofheart
Search